【蘋果驗樓】日出康城MALIBU浴缸漏水漏出小瀑布業主O嘴慘叫：「個廁所好貴㗎！」 - 香港蘋果日報

alatalatteknologi.blogspot.com

會德豐（020）及港鐵（066）合作發展的將軍澳日出康城MALIBU交樓，樓盤一個兩房單位浴缸漏水，缸底秒變水塘，缸底駁出單位外的警示喉甚至流出一道小瀑布，業主陳太即場崩潰地慘叫：「個廁所好貴㗎！」她形容「好似黃河咁樣流啲水出來」，無奈道：「個嘴喺口罩入面O晒！」負責驗收單位的驗樓師陳智康「康仔」指，這是浴缸底水喉甩掉所致，就算缸底有做防水層，「日日咁浸，唔漏水至奇。」此外，單位客廳冷氣機滴水、坐廁水箱漏水，來去水這項扣爆分，捧蛋！

康仔驗收2A座一個兩房戶，實用面積459方呎，兩房間隔，業主2018年4月以逾700萬元買入。行出露台，已見欄杆表面油漆甩皮，「望落樓下，唔單止呢個單位，下面幾個單位都有咁嘅情況，懷疑樓上用洗石水或洗玻璃水，滴落來揦爛咗欄杆」，建議鏟底重新噴油吧！主人房4塊玻璃，有3塊要更換，康仔站在最大一塊玻璃前說：「呢度成堆崩得咁緊要，拜拜啦！隔籬嗰塊玻璃花痕，擘大隻手都度唔晒，超過10厘米，下面細啲嗰塊玻璃都要換。」

很多業主都擔心漏水的問題，這個單位就認真得多，包括坐廁水箱滴水，康仔稱：「每撳一下沖廁，水箱下面就會滴水。沖咗5、6次，地面明顯多咗好多水。呢啲唔係屎水，係新鮮嘅鹹水。石面已經有少少鹽粒，係鹹水蒸發後留低，咁對地面石唔好，唔會咁易爆，但一年半載件石會被侵蝕得好快。」驗樓一個多小時後，客廳冷氣機滴水，康仔認為是去水喉淤塞導致倒灌。

以為瑕疵都搵得七七八八，業主心血來潮，要求發展商派員將原本以玻璃膠邊密封的浴缸生口位鎅開，康仔在浴缸放水，然後抽起活塞後，缸底秒速變水塘，一隻不知死了多久的蜜蜂屍體漂浮。由浴缸底接駁單位外的警示喉更完全招架不住，流水不斷，一時間流出一道小瀑布，同時聽到業主陳太崩潰地慘叫：「個廁所好貴㗎！」根據樓書，廁所面積約36方呎，以單位呎價1.57萬元計，承惠56.5萬元。康仔解釋，浴缸其中一條水喉甩掉，所以一放水就湧入浴缸底，雖然浴缸底有防水層，一時三刻當然無問題，但「日日咁浸，唔漏水至奇。」結果單位的15項工種，來去水及家電兩項零分，窗一項不及格，但其他工種包括批盪油漆及地板等都沒有大問題，總分74分。

業主陳太表示，見到浴缸漏水「個心離一離，個嘴喺口罩入面O晒。不過入伙之前發生呢件事係不幸中之大幸。」見到警示喉不斷噴水，「好似黃河咁樣流啲水出來，真係有啲驚嚇。」業主陳生形容這是「低級錯誤」，「單位外觀上好似好好，但暗藏好多問題。而家最緊要發展商肯執好佢。」

另外，資深驗樓師賴達明驗收另一個1B座兩房單位，這個單位業主較好彩，只是單位部份玻璃崩花、浴室窗外牆角磚崩等等，稍為令人難以接受是平台門邊有一條黑色的、鬈曲的毛髮。驗樓評分94分。

-----------------------------

【全球樓行】 Dream House零距離

屬於香港人的移民攻略

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：

iOS / Android